OnePlus-ის AMA-ს შეჯამება: OnePlus-ი ფანების კითხვებს პასუხობს!

გუშინ reddit-ზე კომპანია OnePlus-მა ერთგვარი ინტერვიუ ჩაატარა, რომელსაც აღნიშნულ საიტზე Ask Me Anything-ს უწოდებენ. ინტერვიუს ფორმატში, ნებისმიერ მომხმარებელს შეუძლია დასვას შეკითხვა და წარმომადგენლები პასუხის გაცემას შეეცდებიან. ინტერვიუში მონაწილეობას კომპანიის რამდენიმე თანამშრომელი იღებდა: Carl, Vito L., Simon L., Robin Z., Bob C., Steven G., Tom Bruno.

ამ სტატიაში კი შევეცდები გადმოვცე ყველა ის საინტერესო კითხვა-პასუხი, რომლებიც გუშინ დაიწერა. მაშ ასე, დავიწყოთ:

კითხვა: რატომ გააუქმეთ პროგრამული უზრუნველყოფის მხარდაჭერა თქვენი ძველი მოდელებისთვის? თქვენ ხომ პატარა სტარტაპი აღარ ხართ. ძალიან იმედების გამაცრუვებელია თქვენი საქციელი. მართალია, უდაოდ კარგ ტელეფონების აკეთებთ, თუმცა განახლებები მაინც აუცილებელია.

პასუხი (Carl): გვესმის თქვენი. მომხმარებლების ნდობის დაბრუნება ძალიან ძნელი იქნება.

აღსანიშნავია, რომ კარლმა (რომელიც, თუ არ იცით, კომპანიის ერთ-ერთი თანადამფუძნებელია), შეკითხვაზე უშუალოდ არ გასცა პასუხი. ამიტომ, ჯერ კიდევ უცნობია, რატომ ვეღარ მიიღეს OnePlus 2-ისა და X-ის მომხმარებლებმა Nougat განახლება, თუმცა მიზეზს ალბათ უკვე აზრი აღარ აქვს.

კითხვა: 

1. კამერის ლინზა საფირონისგანაა დამზადებული?
2. OP5-ს ორმაგი LED განათება აქვს?

თქვენ ილაპარაკეთ იმის შესახებ, თუ რატომ არ გამოიყენეთ უჩარჩოო ეკრანი და აქ ყველაფერი გასაგებია. თუმცა, რას იტყვით წყალგამძლეობაზე, micro-SD ბარათის სლოტზე (თუმდაც ჰიბრიდულზე), USB Type-C 3.0 ან 3.1-ზე, OIS-სა და ორმაგ დინამიკებზე?

• აპირებთ OnePlus 5-ის კამერის პარამეტრების* გამოშვებას?
• იქნება OxygenOS 4.5-ის ახალი ფუნქციები (DCI-P3, ახალი ჟესტები გათიშულ ეკრანზე (S, M, W), კამერის ახალი ინტერფეისი, ვიბრაციის კონტროლი და ა.შ.) ხელმისაწვდომი OnePlus 3/3T-ისთვის?
• რატომ ხართ ოდნავ სქელი კორპუსისა და უკეთEსი ბატერეის წინააღმდეგი?
• გამოვა თუ არა Dash დამუხტვით მხარდაჭერილი power bank-ი?
• შენელდება თუ არა (ან მთლიანად შეწყდება) OnePlus 3-ისა და 3T-ის განახლებები OP5-ის გამოსვლის შემდეგ?
• ვიხილავთ თუ არა წელს OnePlus-ის სხვა მოწყობილობასაც?

პასუხი (Vito L.):

ლინზის დამცავი საფირონისგანაა დამზადებული.

OP5-ს ორმაგი LED განათება აქვს.

OP5-ში არ დავიტანეთ IP68, თუმცა ჩვენი ყველა პროდუქტი შეიცავს ელემენტარული წყალგამძლეობის მექანიზმებს ყოველდღიური გამოყენებისთვის.

ჩაშენებული UFS მეხსიერება micro-SD ბარათზე ბევრად უფრო სწრაფია.

უსადენო კავშირი ბევრად უფრო მოსახერხებელია, ვიდრე USB Type-C 3.0 და 3.1. პლიუს ამას, USB 3.0 LTE კავშირზე იქონიებს გავლენას.

OIS-ის ნაკლებობის მიზეზები:

1. OnePlus 5-ის კამერა ბევრად უფრო თხელია, ვიდრე OnePlus 3/3T-ის.
2. დიაფრაგმის გამო, ჩვენის ტექნოლოგიის წყალობით OIS-ის გარეშე კამერა ბევრად უფრო მკვეთრ და უკეთესი ხარისხის ფოტეობს იღებს.
3. OnePlus 5-ის ახალი EIS-ი ბევრად უკეთესია ვიდეოს გადაღების დროს.

DBASS-ის ტექნოლოგიით დამზადებული ჩვენი ერთი დანამიკი ბევრად უფრო უკეთეს ხმასა და ბასს აწარმოებს, ვიდრე ორმაგი დინამიკები.

კამერის პარამეტრებს გამოვაქვეყნებთ.

ჩვენ გვჯერა, რომ აუცილებელია, ტელეფონი ხელში კარგად უნდა იგრძნობოდეს. OnePlus 5-ის ბატარეა 20%-ით უფრო ენერგოეფექტურია, ვიდრე 3T-ის.

კითხვა:

1. როდის გამოვა OxygenOS 4.5 OnePlus 3/3T-ისთვის?
2. რამდენი ხანი იქნება Android O-ს განახლების მიღების დროის სხვაობა OnePlus 5-სა და 3/3T-ს შორის? კვირები? დღეები?
3. OnePlus 3/3T-ისაც ისევე დაივიწყებთ, როგორც OnePlus 2-ს?

პასუხი (Robin Z.):

• აღნიშნული ვერსიის ბეტა ანაწყობის დაფლეშვა უკვე შეგიძლიათ. ეწვიეთ OnePlus-ის ფორუმს.

• შევეცდებით, რომ აღნიშნული მოწყობილობებისთვის Android O რაც შეიძლება მალე გამოვუშვათ.

• არა.

როგორც იქნა, ერთი კარგი ამბავი გავიგეთ: OnePlus 3/3T დავიწყებას ისევე მალე არ მიეცემა, როგორც OnePlus 2. მოგეხსენებათ, კომპანია OP2-ის მომხმარებლებს Nougat განახლებას შეპირდა, თუმცა მათ ეს არასოდეს მიუღიათ. სულ რამდენიმე დღის წინ კი კომპანიამ ოფიციალურად დაადასტურა, რომ მოწყობილობა აღარასოდეს განახლდება.

კითხვა: რატომ იტყუებით ბენჩმარკებში?

პასუხი (Carl): სისტემა ისეა მოწყობილი, რომ ბენჩმარკის აპლიკაციების ჩართვის დროს, ტელეფონი ისევე მუშაობს, როგორც სხვა მძიმე პროცესების, მაგალითად, 3D თამაშების გაშვების დროს. ჩიპსეტის სრულად დატვირთვა ხდება OxygenOS-ის სხვა ნაწილებშიც, მაგალითად, მაშინ, როცა აპლიკაცია ირთვება.

ჩვენ არ ვუადვილებთ ჩიპსეტს მუშაობას, ანუ, მაგალითისთვის, არ ვცვლით ვუკლებთ მოწყობილობის გარჩევადობას. ასევე არ ვცვლით ჩიპსეტის სისწრაფეს ე.წ. overclocking-ით.

როდესაც მომხმარებელი ტელეფონს ბენჩმარკის საშუალებით ტესტავს, ჩვენ გვჯერა, რომ მას მოწყობილობის სრული პოტენციალის ნახვა უნდა. სწორედ ამიტომ ვააქტიურებთ ამ დროს ჩიპსეტს სრული დატვირთვის რეჟიმში.

ყველა OEM-ს აქვს სისტემაში სხვადასხვა პროფილები სხვადასხვა პროცესებისთვის, შეგიძლიათ თქვენით შეამოწმოთ.